Dejvi Bregu nuk shënon që prej 17 dhjetorit të 2017-ës, pikërisht në sfidën kundër Partizanit, të cilën bluzinjtë e fituan 5-0 në Gjirokastër. Sulmuesi vlonjat i Luftëtarit nuk po rikthehet te goli, por skuadra po vijon të fitojë, ashtu si edhe sot në sfidën kundër Kamzës, me rezultatin 1-0. Bregu u mundua disa herë kundër Kamzës për të shënuar, por nuk ia doli. Duke parë dëshpërimin në aspektin personal që shfaqi sot, tifozët e Luftëtarit i kanë dhënë Dejvi Bregut, një mesazh përkrahjeje.
Përmes një postimi në faqen e tifo-grupit “Shqiponjat Bluzi”, tifozët gjirokastritë tregojnë mbështetjen e tyre ndaj sulmuesit të skuadrës së Luftëtarit, teksa shkruajnë: “Çoje kokën lart vllai, nuk i ka hije një futbollisti si ty e as nuk është në karakterin tënd të ulë kokën. Kjo mund t’i ndodh kujtdo, rëndësi ka që ti je aty në familjen tonë të madhe bluzi. Goli do vijë shumë shpejt ashtu siç po vijnë dhe rezultatet. Të gjithë tifozët gjirokastritë janë me ty në këto momente të vështira, por që së bashku do i kalojmë”.
