Në aksin nacional Gjirokastër-Tepelenë ndodhi diçka e papritur sonte. Për shkak të rrjedhjes së ujit nga linja që furnizon lagjen “Granicë”, befas në rrugë u krijua një gropë e madhe dhe e rrezikshme për automjetet. Çarja e tubit disa metra poshtë kishte gërryer tokën derisa ‘shpërtheu’ më pas në asflat.
Gropa krijonte vështirësi në lëvizjen e mjeteve dhe nuk ishte fort e dallueshme, duke u kthyer në burim asksidentesh. Ndërmarrja e Ujësjellës Kanalizime Gjirokastër dhe ARRSH nisën ndërhyrjen tek linja për të ndalur rrjedhjen e ujit dhe më pas të mbulonin gropën.
Në terren krahas drejtuesve të këtyre institucioneve ishte dhe kryebashkiaku Flamur Golemi. Në pamjet që transmeton Argjirolajm.net, ajo që vihet re është mosrespektimi i distancimit social, një masë e domosdoshme për të frenuar Covid-19. Që nga kryebashkiaku dhe gjithë të tjerët me radhë, qëndrojnë shumë pranë njëri-tjetrit. Distanca që duhet të jetë së paku 1 metër, në këtë rast është shkelur.
©argjiroja.net
