Në më pak se një javë nga nisja zyrtare e fushatës për zgjedhjet e 25 prillit, kandidati për deputet i LSI-së në Gjirokastër, Vangjel Tavo, ka dhënë dorëheqjen nga gara. Përmes një letre publike ai sqaron arsyet e këtij vendimi të papritur. Ne po e sjellim më poshtë të plotë letrën e tij.
Letër publike nga Vangjel Tavo
Miq të nderuar të qarkut Gjirokastër, dua t’ju komunikoj një vendim aspak të lehtë që kam marr në lidhje me zgjedhjet e 25 prillit. Unë nuk do ta vazhdoj më tej garën elektorale. Për këtë kam njoftuar shefe Monën dhe kam dërguar në KQZ kërkesën time përpara se të miratohet zyrtarisht fleta e votimit. Jam menduar shumë gjatë për këtë vendim, por me rrethanat që u krijuan së fundi u binda plotësisht se ky është vendimi i duhur. Është fyerje e madhe për mua si politikan prej 20 vitesh, që të dalin disa tipa të flasin në emrin tim nëpër sokaqet e Gjirokastrës dhe madje të ofrojnë lekë në këmbim të votës. Unë nuk jam legen, që të lejoj të tjerët të ofrojnë lekë në emrin tim. Unë lekët e mia i shpërndaj vetë, s’mund të lejojë palaçot e “Rilindjes” t’i marrin ekskluzivitetin e blerjes së votave LSI-së.
Ne si parti kemi traditë të mirë në këtë drejtim dhe mjaftueshëm përvojë kur është fjala për blerje votash. Të them të drejtën edhe unë u aftësova më shumë kur shkova te LSI-ja. Ishte njësoj si të kisha bërë një fakultet apostafat për këtë punë. Prandaj po them që ia kemi marrë dorën shumë mirë blerjes së votave, nuk mund të na japë leksione “Rilindja” me persona të panjohur që lëvizin nëpër lagje si skutha me makinë me targa false. Jo mor vëlla, ne dalim hapur fare me një “Benz” me Narin, nuk e çajmë kokën për këtë punë. Të vetmin siklet kishim këto “takimet në errësirë”. Nuk na dalin drejtuesit e PS-së, përdridhen si pjeshka sa herë i marrim në telefon. Më ka mërzitur shumë edhe fakti që Çuçi po më bën karshillëk me një furgon ku ka vënë foton e tij.
Sapo e pashë i kërkova Goles që për inat të më stamponte një autobus me foton time dhe sloganin “jam politikan fringo i ri”. Por pastaj hoqa dorë, e para sepse Golja gjithë buxhetin që i tepëroi nga arka e Luftëtarit e hodhi te televizioni që deri më tani e shohin me detyrim militantët tanë dhe roja i objektit. Por kemi shpresë se do rritemi. E dyta sepse s’mund të kem unë slogan etiketat që më vendos me ironi “ArgjiroLajm.net”. Unë vërtet jam i ri, po jo fringo fare. Le të bëhemi seriozë tani dreqi ta marrë, se kam qenë deputet pa shkëputje nga puna për 22 vjet. “Telos pandon” (τέλος πάντων) që thonë grekët, vendimi im është i pakthyeshëm edhe pse e di që ju e keni pritur më parë këtë gjë. Ja, e bëra realitet sot më 1 Prill…
ArgjiroLajm.net ju uron gëzuar Ditën Botërore të Gënjeshtrave. Letrën e mësipërme dhe shumë gjëra të tjera që ndoshta do t’ju thonë sot, mirë është të mos i merrni seriozisht. As Tavon mos e merrni seriozisht sa herë ju flet si të ishte një politikan i paprovuar. Tavo është shumë i vjetër dhe s’ka çfarë bën më ndryshe.
