Fundjavën që kaloi policia njoftoi zyrtarisht për një incident në fshatin Vodhinë të Dropullit, ku ishte konstatuar se ishte hapur memoriali i ngritur për ushtarët grekë të rënë në Luftën e Dytë Botërore. Argjirolajm.net mëson të tjera detaje nga kjo ngjarje, e cila po hetohet gjithashtu nga Prokuroria e Gjirokastrës. Nuk bëhet fjalë për një memorial të njohur zyrtarisht si të tillë nga të dyja vendet. Shqipëria dhe Greqia kanë nënshkruar marrëveshje disa vite më parë për ngritjen e memorialit ku prehen eshtrat e ushtarëve grekë në dy vende në jug të Shqipërisë, në fshatin Bulart të Dropullit dhe në Këlcyrë.
Ndërkohë i ashtuquajturi memorial i ngritur në fshatin Vodhinë, ishte një iniciativë private e ndërmarrë nga një banor i fshatit rreth dy dekada më parë. Në dakordësi më pasardhësit e të rënëve, aty preheshin eshtrat e tre ushatërëve grekë. Por pas ndërtimit të dy memorialeve zyrtarë në Bulart dhe Këlcyrë, autoritetet e të dyja vendeve, Greqisë dhe Shqipërisë, i kanë kërkuar kryeplakut të fshatit Vodhinë që të bëhet zhvendosja e eshtrave pranë tyre. Më konkretisht ato eshtra do të zhvendoseshin në Bularat.
Por vazhdimisht kryeplaku i fshatit Vodhinë ka refuzuar të veprojë në këtë mënyrë. Për zgjidhjen e çështjes ka patur ndërmjetësim edhe prej përfaqësisë diplomatike greke në Shqipëri, ambasadës në Tiranë dhe konsullatës në Gjirokastër. Po kështu i është kërkuar edhe Bashkisë Dropull të ndërhyjë për zgjidhjen e problemit. Nuk dihet ende se kush qëndron pas ndërhyrjes në memorial. Kryeplaku i fshatit që ndoshta ka dashur të fshehë eshtrat e të rënëve, apo ka ndërhyrje nga persona të tjerë. Kjo mbetet për t’u zbardhur nga Prokuroria. ©argjiroja.net