Me përfundimin e këtij sezoni, skuadra e Luftëtarit do të humbasë disa nga yjet e kësaj skuadre që ka argëtuar tifozët shqiptarë në këtë edicion të Superiores. Kristal Abazaj dhe Dejvi Bregu kanë që tani akord me Skënderbeun për t’u bërë pjesë e korçarëve por me shumë mundësi nuk do të veshin asnjëherë fanellën e korçarëve, duke përfunduar në një kampionat larg Shqipërisë.
Dy lojtarët llogariten që tani si të larguar nga skuadra gjirokastrite, por kjo e fundit rrezikon që të humbasë në verë edhe dy elementë të tjerë po aq cilësorë që e kanë ndihmuar në vitin 2018 të kalojë nga një ekip që luftonte për mbijetesë, në një skuadër të denjë për të kërkuar Europën.
Mbrojtësi brazilian Xhekson dhe sulmuesi Shkurtaj kanë tërhequr vëmendjen e klubeve greke, të cilat janë të gatshme të afrojnë futbollistët në fjalë. Sipas “Sport Ekspres”, të dy lojtarët janë vëzhguar nga klube që janë gati të sigurojnë firmën e tyre gjatë verës, sigurisht duke paguar për kartonin meqë janë nën kontratë me Luftëtarin edhe për sezonin e ardhshëm. Megjithatë, në Gjirokastër shpresojnë që në rast kualifikimi në Europë, të kenë mundësinë të mbajnë si këta dy lojtarë, ashtu edhe Abazajn e Bregun për ndeshjet ndërkombëtare.
