Në Gjirokastër nuk fitojnë prej muajsh, e megjithatë konfirmojnë trajnerin. Jorgos Marantas do të vazhdojë ta drejtojë Luftëtarin dhe është drejtori sportiv ai që e pohon një gjë të tillë. Në një prononcim të dhënë për “Panorama Sport”, Artur Dadaj saktëson se tekniku grek ka mbështetjen dhe besimin e të gjithëve.
“Jorgo Marantas do të jetë pjesë e Luftëtarit. Trajneri ka mbështetjen tonë si drejtues. Ne besojmë deri në fund tek objektivi që kemi. Me prurjet cilësore në merkaton e janarit, Luftëtari nuk do ta diskutojë mbijetesën. Stafi është fokusuar në merkaton e janarit dhe për të realizuar këtë objektiv, jemi futur në tratativa për të afruar lojtarë cilësorë. Nuk mund të flas për emra konkretë. Nuk duhet të nxitohemi”, thotë fillimisht zyrtari i klubit. Pak ditë më parë ka ikur edhe mbrojtësi Paraskevas Prikas, megjithatë drejtori mundohet që t’u japë fund aludimeve:
“Për arsye familjare, Prikas ndërpreu marrëdhëniet kontraktuale me Luftëtarin. Nuk ka vend për aludime. E theksoj, arsyeja e vërtetë është familjare. Prikas është lojtar i lirë dhe si i tillë ka të drejtën e tij për të bërë zgjedhjen e duhur”. Sakaq, skuadra nisi përgatitjet dje nën drejtimin e dyshes Marantas-Novi.
U krye edhe analiza e humbjes, ndërsa në stërvitje mungonte vetëm kapiteni Donald Rapo, për arsye familjare. Kjo ecuri ka tronditur opinionin gjirokastrit, aq sa ish-trajneri Theodhori Kalluci evidenton se kurrë Luftëtari nuk ka qenë kaq keq. “Në kujtesën time nuk mbaj mend një ecuri kaq negative, madje as kur kemi rënë në Kategorinë e Dytë. Gjithsesi, nuk është vonë për të reflektuar”, thotë Kalluci.
