Brezi i ri gjithnjë e më shumë po afrohet me artin dhe kulturën kjo për shkak të nismave të ndërmarra nga institucionet përkatëse. Të rinjtë po i kthejnë në destinacione të preferuara gjatë këtyre muajve vendet e trashëgimisë kulturore ku njihen nga afër me historinë dhe vlerën e këtyre aseteve të cilat tregojnë identitetin dhe kulturën tonë.
Në kuadër të programit “Edukimi Nëpërmjet Artit dhe Kulturës” DRKK Gjirokastër në bashkëpunim me shkollën 9 -vjeçare “Naim Frashëri” organizuan sot orën e lirë “Të njohim monumentet” në shtëpinë e shkrimtarit gjirokastrit “Ismail Kadare”.
Nxënësit u njohën me strukturën e shtëpisë si dhe historikun e saj.Kjo nismë për të njohur më mirë monumentet do të vazhdojë edhe për njohjen e të gjitha monumenteve të kulturës nga ana e nxënësve.
Gjirokastra përpos vlerave të jashtëzakonshme historike dhe kulturore, është e lidhur me gjeniun letrar, Ismail Kadarenë, që e ka bërë letërsinë shqipe të flasë në 45 gjuhë të botës duke e prezantuar denjësisht Shqipërinë me historinë dhe kulturën e saj ndërshekullore.
Pasi hedh hapin e parë në shtëpinë e shkrimtarit tone te famshëm, të mbushur me emocion, futemi në pjesën që quhet nëndivani, aty ku hapësira të lejon të shohësh shumë objekte njëkohësisht, një pus që gjendet përballë portës dhe dyert e ambienteve të tjera që të ftojnë ti hapësh, për të parë se çfarë ndodh më tej. Në këtë mjedis thuajse çdo mur është i ndërtuar me gur.
Lajtmotivi i elementëve përbërës të banesës së Kadaresë janë guri dhe druri. Ndërkohë që në katin e poshtëm mbizotërojnë platformat me gurë, në katin e sipërm kryeson druri ku çdo element i punuar me të është i zbukuruar pa ja humbur autenticitetin banesës tipike gjirokastrite.
Një udhëtim në shtëpinë e shkrimtarit Ismail Kadare të bën të udhëtosh nëpër subjektet e romaneve ku ai përjetësoi ambientet dhe vlerat e pakontestueshme të shtëpive karakteristike të Gjirokastrës.
