Luftëtari është një nga ekipet shqiptare që do të marrë pjesë në Kupat e Europës dhe drejtuesit e tij po përpiqen ta riorganizojnë sa më shpejt grupin e futbollistëve, pasi kanë sjellë në stol trajnerin slloven Milosh Kostiç.
Katër të larguarit direkt pas mbylljes së sezonit, Bregu, Abazaj, Athanasopulos dhe Toledo u pasuan nga kapiteni Orjad Beqiri, i cili dy ditë më parë shpalli “divorcin” me ekipin gjirokastrit. Por largimet vazhdojnë.
Lojtarët me aktivizim të paktë si Minga, Lamçe, braziliani Aurelio dhe Janku, janë të larguar nga Luftëtari, edhe pse nuk ka ndonjë njoftim zyrtar nga klubi. Gjirokastritët kanë “hyrë në ujë” dhe u duhen përforcime me urgjencë, por për to do të vendosë trajneri i ri. Nesër Luftëtari nis punën në terren dhe pritet të ketë emra të rinj.
Luftëtarit i duhen patjetër afrime në sulm dhe në mbrojtje, por edhe një portier tjetër, pasi për momentin ka vetëm Ruçin.
