2025 ishte një vit unik për Kombëtaren kuqezi, për krenarinë e shqiptarisë, një vit ku për herë të parë në histori prekëm fazën “play-off” të një Botërori, arritën të siguronim një vend në shortin e Botërorit, por askush nuk dëshiron të ndalet këtu, të gjithë ëndërrojnë që për herë të parë të jemi prezent në fazën finale të një Botërori.
Kjo ëndërr e madhe kalon nga 2026, nga ky vit, ku në mars kuqezinjtë do të përballen fillimisht me Poloninë dhe nëse kalojmë këtë pengesë, në finalen e “play-off” do të luajmë ndaj fituesit të çiftit Ukrainë-Suedi. Kjo do të ishte një kryevepër, një ëndërr që shqiptarët e presin prej afro një shekulli.
Në futboll, në kohët e sotme asgjë nuk është e pamundur, për më tepër që Sylvinho ka në dispozicion një grup me shumë cilësi, lojtarë që po bëjnë mirë në ekipet respektive.
Më në fund është rikthyer në nivele të larta Armando Broja, shpresa e madhe e tifozëve kuqezi, me “bomberin” shqiptar që në 3 ndeshjet e fundit ka shënuar një gol dhe ka dhuruar një asist.
Një formë fantastike po kalon edhe Ernest Muçi, me sulmuesin kuqezi që është rikthyer në kryefjalë në Turqi. Në futboll sigurisht duhet edhe pak fat, për këtë arsye të gjithë kryqëzojnë gishtat që 2026 të jetë viti i shqiptarëve, me pak fat mund të bëjmë realitet një ëndërr të madhe, për herë të parë në histori të jemi pjesë e një Botërori.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
