Pasi u largua nga “Portokallia”, Eneda Tarifa i është përkushtuar me kohë të plotë muzikës duke u tërhequr pak nga ekrani për një shkëputje të përkohshme, siҫ e ka quajtur vetë këngëtarja largimin nga spektakli i humorit. Edhe pse emri iu lakua disa herë si pjesëmarrëse në formate të ndryshme televizive, për Enedën nuk pati asgjë konkrete. E, me sa duket, këngëtarja është duke menduar e planifikuar një program të sajin.
E ftuar pasditen e sotme në “E diell”, përballë Adi Krastës, pasi foli për projektet muzikore, për pjesëmarrjen në Eurosong dhe për pjekurinë artistike në vite, Eneda hodhi edhe shashkën e parë për planet me ekranin. Ende nuk duket të ketë diҫka konkrete, megjithatë ajo është duke menduar. Ndërsa Krasta e ngacmoi për një show të tipit “Eneda by Night”, këngëtarja tha: “Jam duke u menduar dhe duke përfituar nga kjo kohë për të bërë më të mirën e aseteve të mia në një gjë timen…”
Duke sjellë disa nga këngët më të dëgjuara të artistëve botërorë, si “It’s A Man’s Man’s Man’s World”, Eneda u bë pjesë edhe e intervistës me pyetje ngacmuese të Krastës, edhe atyre pyetjeve që përfshinin dashurinë e saj për të qenë pjesë e ekranit. Pyetjes nëse e dashuron ekranin, Eneda i përgjigjet: “Unë dashuroj Top Channel. Kjo është pak, por e sigurt…”, por pa dhënë ndonjë detaj më shumë nëse ka plane konkrete për të realizuar ndonjë gjë të re në këtë ekran.
