Kryebashkiaku i Kolonjës, Erion Isai, ka folur për herë të parë hapur mbi jetën e tij private në emisionin “Goca dhe Gra”, duke pranuar publikisht divorcin dhe romancën e tij të re.
“Unë nuk jam prifti i Kolonjës, por kryetari i bashkisë. Nuk ka ndarje që nuk është e vështirë, jam në një paqe fantastike me veten dhe mendoj se është një nga vendimet e drejta që kam bërë në jetë,” – u shpreh ai.
Isai tregoi se ndarja kishte ndodhur para dy vitesh, por vetëm së fundmi ai kishte vendosur ta bëjë publike, duke theksuar se ishte një hap i rëndësishëm për të dhe familjen:
“I vetmi moment i vështirë është përshtatja me nocionin e një familjeje të re, që vajzat duhet të ndajnë kohën me nënën e tyre dhe mua. Proces që ka vështirësitë e veta. Nuk di të shpjegoj ndjesitë e para dy viteve, por është një shkallë që ti e bën edhe ecën. Arsyet e divorcit, është një kapitull që nuk dua të rimbush portalet. Besoj se ka qenë vendimi më i drejtë që kemi marrë, sepse kur një gjë nuk funksionon, nuk funksionon”.
I pyetur për një postim të mëparshëm të ish-bashkëshortes, ku ajo shprehej se “është e vështirë të bësh dhe gruan dhe burrin”, Isai tha prerazi se nuk dëshiron të komentojë publikisht për të, por theksoi respektin dhe përfshirjen e tij në jetën e vajzave:
“Nënën e fëmijëve të mi do ta respektoj si nënën e fëmijëve të mi dhe nuk do të bëjë kurrë një koment për të. Sa i përket kujdesit për fëmijët, marrëdhënia me vajzat është përtej ditëve të përcaktuara nga Gjykata, edhe kuota mujore është përtej. Fëmijëve nuk u kemi shpjeguar një nocion të divorcit, por që do kemi dy shtëpi, me mamin dhe babin, në evente të shkollës mundohemi të jemi të dy”.
Mes rrëfimit personal, ai pranoi edhe një tjetër fakt të ri nga jeta e tij:
“Kam një romancë të re, kam një jetë të re në jetën time”.
“Unë i jap llogari personit tim të zemrës dhe askujt, nuk më intereson. Më është dukur një qelbësirllëk në përgjithësi. Nuk më bën përshtypje, një kazan i madh që nuk më bën përshtypje”.
