Shqipëria dhe Serbia morën dritën jeshile për të bashkorganizuar Kampionatin Evropian 2027 për moshat U-21. Në Shqipëri dhe Kosovë pati shumë zëra kundër, teksa tanimë gjithçka ka marrë “ok” e Komitetit Ekzekutiv në UEFA.
Në lidhje me këtë event ka folur edhe kreu i UEFA-s, Aleksandër Ceferin. Slloveni foli për median e vendlindjes “Delo” dhe fillimisht tha se ka një dashuri për vendet e Ballkanit.
“Unë kam një dashuri të veçantë për të gjitha kombet e ish-Jugosllavisë. Dekadat e fundit kanë qenë shumë të trishtueshme. Por i gjithë Ballkani Perëndimor është një bombë me sahat. Problemi kryesor është se liderët e tyre po bisedojnë me burokratët evropianë që nuk e kuptojnë mendësinë e Ballkanit, ish-Jugosllavisë, Shqipërisë dhe vendeve të tjera”, tha fillimisht slloveni.
Më pas Ceferin u ndal edhe te Euro 2027 mes Shqipërisë dhe Serbisë.
“Interesant është fakti se shoqatat e futbollit shqiptar dhe atij serb, të mbështetura nga të dyja qeveritë, kanë shprehur dëshirën për të organizuar këtë garë së bashku, një dëshmi e mëtejshme se sporti është mbi politikën. Se sportet janë diçka e mirë. Kjo është një mundësi e shkëlqyer për të treguar se futbolli është mbi politikën e përditshme”, tha Ceferin.
Kështu, në qershor të vitit 2027 do mbahet ky event dhe tanimë janë mësuar edhe stadiumet në vendin tonë. “Arena Kombëtare”, “Loro Boriçi”, “Arena Egnatia” edhe “Elbasan Arena” do mirëpresin talentet e ardhshme të futbollit evropian.
