Kryetari i Bashkisë Gjirokastër ka bërë publike më shumë detaje nga ajo që ai e konsideron zhvatje të parave publike nga drejtuesit e klubit të futbollit Luftëtari. Gjatë një takimi me ish futbollistë dhe njerëz të sportit në Gjirokastër, Golemi përmendi disa fatura fiktive me qëllim për të fryrë shpenzimet e klubit dhe marrë pastaj para nga buxheti i bashkisë. Sipas kryebashkiakut, gjatë mujve prill-qershor 2018 janë bërë fatura për blerjen e 1050 kg kripë, 16 mijë kilogramëve fruta dhe 800 litra shampo.
Pra, i bie që për tre muaj, klubi Luftëtari të ketë harxhuar 1 ton kripë, 16 ton fruta dhe 800 litra shampo. Sasia e blerë është në një sasi tepër të lartë dhe totalisht të panevojshme për nevojat normale të një ekipi futbolli. Sipas kallëzimit të depozituar sot në Prokurori nga Bashkia Gjirokastër, shumica e faturave tatimore të shitjes të paraqitura nga shoqëria aksionare “KF Luftëtari” janë fotokopjuar në mënyrë të tillë që nuk mundësojnë verifikimin e artikujve dhe sasisë korresponduese të tyre për çdo faturë.
Gjatë ditës së sotme Bashkia Gjirokastër kallëzoi penalisht Bekim Halilajn, Zamira Ramin, Grigor Tavon dhe Donjaldo Hoxhen. Bashkia i akuzon ata për “Mashtrim me subvencione”, “Krijimi i skemave mashtruese lidhur me tatimin mbi vlerën e shtuar”, “Shpërdorimi i kompetencave”, “Fshehja e të ardhurave” dhe “Falsifikimi i vulave, stampave apo formularëve”.
©argjiroja.net
