Reperi i njohur Fero duket se po jeton një nga periudhat më të rëndësishme të jetës së tij, duke nisur një kapitull të ri larg vëmendjes së publikut. Burime pranë emisionit “Prive” bëjnë me dije se artisti është bërë baba për herë të dytë, një lajm që ai ka zgjedhur ta mbajë plotësisht privat.
Pas ndarjes nga ish-bashkëshortja, modelja Arbenita Ismajli, me të cilën ka vajzën Nina, Fero kishte nisur një lidhje me një vajzë jashtë botës së showbiz-it, të njohur si Nita. Kohët e fundit, mungesa e tyre në rrjetet sociale kishte nxitur dyshime për një ndarje, por rezulton se çifti ka qenë duke përjetuar në heshtje një nga momentet më të bukura, ardhjen në jetë të fëmijës së tyre.
Ndërkohë që në planin personal ka zgjedhur diskrecion total, në aspektin profesional reperi ka vendosur të flasë hapur. Përmes një postimi të gjatë në InstaStory, ai ka rrëfyer sfidat e vitit të fundit, duke përmendur lodhjen, turnetë intensive dhe përballjet me çështje ligjore si arsye të mungesës së publikimeve muzikore.
Megjithatë, Fero ka siguruar fansat se rikthimi i tij është i afërt dhe më i fortë se kurrë. Ai ka paralajmëruar një strategji të re, duke premtuar publikimin e një kënge çdo dy javë. Me një familje të zgjeruar dhe një arsenal projektesh të reja, artisti pritet të shënojë një fazë të re të rëndësishme në karrierën e tij.
