Luftëtari e ka fituar ndeshjen ndaj Lushnjes me rezultatin 2-0. Pavarësisht rezultatit të arritur, ekipi i Likës ka vuajtur paksa në këtë ndeshje, të cilën nuk e ka zgjidhur aq lehtë sa pritej fillimisht. Në një intervistë për “Supersport”, Lika e ka theksuar këtë fakt, duke u shprehur se ndeshja ndaj Lushnjes nuk ishte aspak e lehtë, ndërsa bluzinjtë vazhdojnë të kenë të njëjtin problem, atë të konkretizimit.
“Problemi qëndron se të gjithë thonë se është e thjeshtë ndaj Lushnjes, por ne e pamë se ishte e vështirë kjo ndeshje, pasi nuk arritëm të shënonim dot një gol të dytë me lehtësi.
Jemi shpërblyer nga një kundërsulm në momentin e fundit. Tashmë do të konsiderojmë të gjithë njëlloj kundërshtarët e Superiores. E nisëm pjesën e parë në mënyrën e duhur dhe kundërshtari u mundua të mbyllej sa më mirë mbrapa. Kemi shpërdoruar shumë raste dhe kjo na ndodhi edhe sot. Objektivi i parë ishte t’i largoheshim fundit të tabelës, por me këto rezultate të arritura, na rriten pretendimet edhe për më lartë. Tashmë duhet të mendojmë për çdo kundërshtar dhe duhet të jemi më prodhues në aspektin sulmues, për të realizuar sa më tepër gola.
Në pjesën më të madhe të lojës kemi qenë të qetë, por me kalimin e minutave situata vështirësohet. Nuk duhet të harrojmë se ndaj Lushnjes kemi aktivizuar thuajse të gjithë futbollistët. Nxitimi në pasin e fundit na krijon këto probleme që na vendos në vështirësi”, është shprehur Lika.
