Trajneri i Tiranës, Ardian Nuhiu doli në konferencë pas ndeshjes së fituar 0-1 ndaj Bylisit.
“Futbolli kërkon vazhdimësi dhe besoj që kemi shumë punë deri në fund. Duhet të përgëzoj futbollistët për mënyrën si interpretuan ndeshjen, në aspektin taktik ishin shumë të disiplinuar, gjithashtu kishte guxim, kurajë e personalitet, atë që kishim përgatitur e arritëm, në të dy pjesët.
Mendoj se me plot meritë e fituam, edhe pse e dimë që në Ballsh është fushë e vështirë. Kishim raste në pjesën e parë dhe në të dytën, ku shkuam te rasti që u realizua penalltia. Duhet të jemi me këmbë në tokë, kemi shumë punë për të bërë, por besoj fuqishëm te cilësia e grupit dhe fitorja është e tyrja sot.
Kërkoja nga skuadra të rrinim te zona e dytë për të shfrytëzuar shpejtësinë që kemi në sulm, mes pjesëve ngjita më lart Patrik dhe Alvarez dhe kishim vetëm Rafa, në një 4-1-4-1, shumë më mirë funksionoi.
Kjo ishte arsyeja pse nuk kishin më shumë lojën në zotërim dhe erdhëm te rasti. Padyshim kemi punuar edhe të kemi topin e të shkojmë në zonën e kundërshtarit, por koha është e shkurtër, lojtarët na janë afruar brenda pak ditësh dhe kjo e manovrës do kohën e vet.
Me Markun ishim të detyruar për mungesën e Lleshit, jemi në kërkim të një mbrojtësi për të shtuar konkurrencën, edhe pse Marku e Lleshi kanë luajtur shumë mirë. Skuadra është përgatitur mirë, po mundohemi të menaxhojmë forcën, të kemi kujdes të mos shkojmë te dëmtimi. Do mundohemi ndeshje pas ndeshje, duke pasur kujdes me Xhixhën, Ernest e Alvarez që të shkojmë te përgatitja fizike e mirë. Kampionati është i ngjeshur, do përgatitim skuadrën për çdo kundërshtar që kemi përballë.
Në fakt ishim përgatitur të luajmë me periudha, kur të ndjeja mund të luanim me presing të lartë. Është pak e vështirë, në momentin që duhet të ndërtojmë, kjo do kohën e vet se derisa të japim lëvizjet që kërkojmë si skuadër apo duke marr më të mirën nga secili, është pak më e vështirë. Por mundohem në çdo stërvitje të shtroj filozofinë, po përqendrohemi te kualiteti që të marrim më të mirën te gjithsecili.
Merkato? Kemi diskutuar, ndoshta jemi në pritje të dy futbollistëve, në mesfushë do të shtojmë konkurrencën, me këto dy blerje, skuadra bëhet më e plotë për shkak se rruga është e gjatë. Drejtuesit po punojnë në këtë aspekt që të arrijmë të sjellim këta dy futbollistë”, tha trajneri Nuhiu.
