Nga Flamur Golemi
Përmbyllëm dy ditë intensive në Gjirokastër që përkojnë me vizitën e kryeministrit dhe nisjen e disa investimeve të rëndësishme e të shumëpritura, me impakt të drejtpërdrejtë në jetën e banorëve dhe ekonominë lokale. Parkingu nëntokësor dhe rehabilitimi i sheshit “Çerçiz Topulli”, ndërtimi i bypassit dhe projekti i muzeve, por edhe rikonstruksioni i teatrit “Zihni Sako” që po shkon drejt përfundimit, në këtë fillimviti janë vërtet një lajm i mirë për Gjirokastrën. Dhe të mendosh që këto investime po kryhen në një situatë të vështirë për vendin pas goditjes nga tërmeti dhe pandemia. Falenderimi dhe mirënjohja i shkon mbi të tjerë kryeministrit Rama, i cili e ka mbështetur vazhdimisht Gjirokastrën me investime dhe projekte që kanë hapur një perspektivë të qartë zhvillimore. 7 vite më parë Pazari i Gjirokastrës ishte një zonë, ku ata që e merrnin riskun për të hapur një biznes, mund të konsideroheshin edhe si të “çmendur”, ndërsa sot është zona më atraktive jo vetëm për turistët, por edhe për ata që duan të investojnë apo të zhvillojnë një pronë. Kurrë më parë Gjirokastra s’ka pasur kaq shumë investime dhe vëmendje. Kjo s’do të thotë se s’ka nevoja të tjera dhe tani duhet ta flemë mendjen. Përkundrazi besimi i madh që na kanë dhënë qytetarët dhe do të na japin sërish më 25 prill, na ngarkon me përgjegjësinë të jemi në lartësinë e nevojave të tyre. Dihet kjo punë, njerëzit kërkojnë dhe presin më shumë nga ne, sepse nga ata që kemi përballë nuk presin e as shpresojnë gjë fare.
