Deputeti i Partisë Socialiste, Flamur Golemi ka dhënë së fundi një intervistë për gazetën ‘Sot’. Ndër të tjera ai është pyetur edhe për një kandidim të mundshëm në zgjedhjet lokale të qershorit 2019 për Bashkinë Gjirokastër. Pyetjes së gazetarit nëse kishte dijeni për lajmet që qarkullojnë se ai mund të jetë kandidat i socialistëve dhe nëse do ta pranonte një sfidë të tillë, Golemi i përgjigjet kështu:
“Unë ushtroj mandatin e deputetit që prej shtatorit 2017 dhe jam totalisht i fokusuar ta përmbush sa më mirë besimin që më dhanë qytetarët me votë. Ditët e fundit siç mund ta keni marrë vesh kam qenë vazhdimisht në terren në ndjekje të situatës së shkaktuar nga reshjet e dëborës në Gjirokastër. Nuk e di cili është burimi i këtyre lajmeve që ju thoni. Të jem i sinqertë personalisht as që i kam vënë re”
Pyetjes se a po punon Partia Socialiste për këto zgjedhje dhe a janë socialistët optimistë që do t’i fitojnë ato, deputeti i Gjirokastrës jep këtë përgjigje.
“Problemi nuk është nëse do të fitojmë zgjedhjet. Problemi është sa e thellë do të jetë fitorja. Dhe që të kuptohemi, nuk është fitimi i zgjedhjeve qëllim në vetvete, por ne jemi alternativa më e mirë. Nuk jemi më të mirët, kemi plot gjëra për të përmirësuar, por më të mirë se Partia Socialiste e Shqipërisë nuk ka. PS po punon për zgjedhjet dhe shumë vendime, përfshi edhe kandidatët do të zyrtarizohen në muajin mars kur do të mbahet kongresi.”
©argjiroja.net
