Gazmir (Enri) Ajdinaj, kunati i botuesit Henri Çili ka reaguar një ditë pasi ky i fundit u la nën masën “detyrim paraqitjeje” nga Gjykata e Përmetit. Në një lidhje në “Report TV”, Ajdinaj u shpreh se e gjithë kjo skenë është bërë për t’i prishur imazhin Çilit, pasi ky i fundit nuk ndërhyrë për asgjë. Ajdinaj tha se vëllzerit Aliko i ka takuar në burg dhe se këta të fundit i kanë kërkuar avokat.
“Henri Çili s’ka lidhje fare. Ai nuk ka ndërhyrë. Vëllezërit Aliko i kam takuar në burg dhe më kanë kërkuar avokat. Studioja e Çilit sërish nuk ka lidhje. Studioja ende nuk kishte marrë asnjë dosje. E gjithë kjo skenë është bërë për t’i prishur imazhin Çilit. Në përgjime s’ka asnjë premtim. Është politike. Çili ka frikë nga ligji dhe mua më takonte rrallë,”- tha Ajdinaj.
Një natë më parë, Gjykata e Përmetit dha masën “në detyrim paraqitje” për Henri Çilin, i cili u vu në prangat e policisë gjatë operacionit “Mezhgorani”. “Detyrim paraqitje” u dha edhe për dhjetë persona të tjerë, mes tyre noterja Shpresa Gjoçaj dhe dy vajzat, Kristina Bashi dhe Kejsi Meço. Në burg u lanë 16 persona, ndërsa tashmë dosja është në duart e SPAK. Ndërkohë sot pritet të jepet masa e sigurisë Betim Shkupin dhe biznesmenin Sait Fishta.
