Një ditë pas aksidentit tragjik në autostradën DN6 në Rumani, ka reaguar kushëriri i shqiptarit Vasil Palo, një nga 7 tifozët që humbën jetën. Në një deklarate për median, Thomaq Ninka tregon se Palo jetonte në Greqi dhe i ati i kishte ndërruar jetë, jetonte me motrën dhe të ëmën.
Sipas Ninkës, marrëdhënia e tyre u zbeh pasi i ati i viktimës, ndërroi jetë dhe e ëma u rimartua. Kushëriri i Palos, shprehet i pikëlluar teksa shprehet se, e mori vesh lajmin nga TV dhe se kjo tragjedi është një fatkeqësi e madhe.
Kushëriri i viktimës:
“Jam kushëriri i parë i babait të Vasilit. Ne e morëm vesh lajmin nga TV, e dhanë lajmet. Djali kishte lindur në Greqi. Janë të rinj, kishin ikur të shihnin një ndeshje, nuk e di se çfarë ekipi ishte, siç iknin me fugon ishin përplasur me një kamion edhe kjo është ngjarja. Jetonte në Greqi dhe i ati i kishte ndërruar jetë, jetonte me motrën dhe të ëmën. Nuk kemi patur shumë lidhje qëkur i vdiq i ati dhe e ëma u rimartua me një tjetër. Ne nuk dimë se çfarë ndodhte andej, s’kanë ardhur ndonjëherë këtu në Shqipëri ata. Ka gati 10 vite i ati që i ka vdekur, kur Vasili ishte rreth 13-14 vjeç. Ishin emigrantë në Greqi, nga Korça është edhe e ëma, të gjithë nga Korça dhe kanë ikur në emigrim siç ikin Shqiptarët. Andej kanë lindur dhe djali dhe vajza. Fat i keq, fatkeqësi e madhe”, tha ai.
