Luftëtari është duke u rikthyer në formën e sezonit të shkuar. Pasi u gjend për një moment në zonën e ftohtë të renditjes, ekipi i Likës është rikthyer në nivelin e duhur. Në javën e shkuar ishte një fitore historike ajo ndaj Partizanit, me rezultatin 5-0. Tashmë vjen momenti për një tjetër fitore të rëndësishme, këtë herë ndaj Kukësit në transfertë me rezultatin 1-2. Në një prononcim për “Supersport”, Hasan Lika është shprehur shumë i lumtur për rezultatet e arritura në javët e fundit.
Fitorja ndaj Kukësit
“Luftëtari është duke kaluar një moment të mirë si në lojë dhe rezultat. Ekipi është duke shpërblyer pasi më parë loja e bukur e zhvilluar nuk po pasqyrohej në rezultate.
E rëndësishme është që pas fitores me Partizanin arritëm të fitonim me kampionët e Shqipërisë. Luftëtari arriti të bëj mbylljen e duhur por nuk kemi keqardhje për mbylljen e këtij viti në momentin tonë më të mirë.
Merkato
Kjo skuadër ka nevojë të forcohet më shumë në organikë. Këtu po flasim për të mirën e skuadrës dhe jo të individëve. Do të dëshiroja të mos na largoheshin lojtarët më të mirë të ekipit por nëse ata do të largohen, atëherë do i urojmë suksese.
Arbitri
Tension i gjykimit lidhet me ndeshjet e kaluara dhe kjo është e kuptueshme. Por gjithsesi për rastin e penalltisë së Kukësit, krahu i futbollistët së Luftëtarit ishte natyral dhe kam dyshimet e mia në akordimin e kësaj penalltie”, është shprehur Hasan Lika.
