Juve po shijon momentin më të mirë të sezonit ku mes Serie A dhe Champions ndaj Napolit siguroi fitoren e 5-të radhazi, 5 fitore dhe për më tepër asnjë gol të pësuar, thjesht perfekt. Kjo ecuri fantastik fut ekipin e Spallettit në garë me kohë të plotë për një vend në zonën Champions në një kohë kur ndodhen vetëm 1 pikë larg Napolit dhe Romës.
Në “Stadium”, Juve ishte perfekte ndaj Napolit, doli me 3 pikë pas suksesit të pastër 3-0. Thuram lëshoi sinjalin e parë ku pas vetëm disa minutash, sulmuesi francez goditi traversën me një goditje shumë të bukur. Goli ishte në ajër dhe në minutën e 22-të, David brenda në zonë kaloi “Zonjën e Vjetër” në avantazh me një goditje të saktë. Me Napolin të hedhur përpara, në kërkim të golit të barazimit, Yildiz dyfishoi shifrat pas një aksioni të bukur, të finalizuar me shumë klas. Juve mbylli llogarite me Napolin në minutën e 86-të ku Kostic me një goditje të saktë nga distanca sigloi shifrat në 3-0.
Me të drejtë, Spalletti feston pas kësaj suksesi: “Të gjithë fitoret janë të rëndësishme, vlejnë gjithnjë tre pikë. Të gjithë ndeshjet janë të vështira, po këto janë fitore që të bëjnë të vetëdijshëm për forcën dhe atë që po bëjmë, i shërbejnë shumë edhe lojtarëve të shprehen në nivele të larta”, u shpreh Spalletti pas suksesit kundër Napolit.
I pakënaqur për faktin që doli pa pikë nga Torino, Antonio Conte nuk pranoi të flas në lidhje me garën për titull: “Në këto momente kjo është një pyetje absurde, kjo pasi mungojnë edhe 16 ndeshje deri në fund. Nuk mund të zbresësh nga ania pasi janë të gjithë objektivat në valle, Champions, Europa League etj. Nëse zbret nga ania rrezikon të mbetesh jashtë Evropës. Ne do të përpiqemi të bëjmë më të mirën”, u shpreh Conte.
Suksesi i Juves ndaj Napolit mori faqet e para të mediave italiane: “Fluturon Juve, arratiset Inter”, shkruan La Gazzetta dello Sport në faqen e parë. “Buzëqesh Lucio, Juve shtrin Napolin”, shkruan Corriere dello Sport.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
