FSHF organizon seminar mbi inteligjencën emocionale në “Shtëpinë e Futbollit” me stafet e ekipeve kombëtare

Federata Shqiptare e Futbollit organizoi në ambientet e “Shtëpisë së Futbollit” një seminar të dedikuar inteligjencës emocionale, me pjesëmarrjen e trajnerëve të ekipeve kombëtare të djemve dhe vajzave, si edhe drejtuesve të disa departamenteve kyçe brenda FSHF-së.

Seminari u fokusua në rëndësinë e inteligjencës emocionale në futbollin modern, duke trajtuar tema si menaxhimi i emocioneve, komunikimi efektiv, përballimi i stresit, konfliktet, si dhe balancimi mes fitoreve dhe humbjeve, që përbëjnë elementë thelbësorë për zhvillimin profesional të trajnerëve dhe stafit teknik.

Drejtori Teknik i FSHF-së, Fulvio Pea, në një prononcim për fshf.org e cilësoi seminarin si një ditë të veçantë dhe të vlefshme për të gjithë pjesëmarrësit.

“Ka qenë një ditë e veçantë, si për trajnerët tanë të ekipeve të djemve dhe vajzave, ashtu edhe për përgjegjësit e departamenteve Goalkeeper, Fitness Coach dhe Videoanalizës. Një trajner i mirë duhet të njohë teknikën dhe taktikën, por për të qenë i suksesshëm duhet të dijë si të menaxhojë konfliktet, fitoret dhe humbjet, si të komunikojë dhe të ndërhyjë në situata të ndryshme. Sot, aspektet e menaxhimit janë një kërkesë dhe nevojë thelbësore për çdo trajner,” – u shpreh Fulvio Pea.

Nga ana e saj, trajnerja Iris Bajo theksoi ndërthurjen mes teorisë dhe praktikës, si një nga pikat më të forta të seminarit.

“Ishte shumë interesante mënyra se si çdo qasje teorike u shoqërua me shembuj praktikë nga vetë pjesëmarrësit. Konceptet teorike u lidhën drejtpërdrejt me përvojën e tyre në jetën sportive dhe profesionale. U trajtua gjithashtu elementi i konsumimit në punë, burnout-i dhe stresi, të lidhura ngushtë me realitetin e përditshëm të futbollit. Përmes këshillimit dhe praktikave konkrete, u synua ofrimi i mjeteve për përballimin më të mirë të këtyre sfidave,” – tha Bajo.

Ky seminar është pjesë e vizionit të Federatës Shqiptare të Futbollit për të investuar në zhvillimin e vazhdueshëm profesional dhe njerëzor të trajnerëve dhe stafit teknik, duke e konsideruar inteligjencën emocionale si një komponent kyç në rritjen e performancës dhe suksesit afatgjatë në futboll.

© BalkanWeb