Rreth dy muaj më parë Bashkia Gjirokastër inaguroi sistemin e ngrohjes me kaldaja në shkollat 9-vjeçare të qytetit. Por përveç problemit të ngritur nga drejtuesit e këtyre shkollave se rrjeti i ngrohjes nuk ishte shtrirë edhe në korridore, por vetëm në klasa, problemi tjetër që del së fundi është mungesa e lëndës djegëse. Të paktën kjo konstatohet në shkollën ‘Naim Frashëri’. Nxënësit dhe drejtori, Krenar Bazaiti, thonë për Televizionin Gjirokastra, së bashkia i ka lënë pa naftë, prandaj kaldajat nuk mund të funksionojnë. Sipas drejtorit, shkolla është furnizuar me rreth 1 mijë litra naftë në muajin dhjetor. Kjo sasi është përdorur deri në fund të muajit shkurt, ndërsa më vonë nuk ka patur më furnizim nga Bashkia Gjirokastër.
‘Jemi drejtuar pranë bashkisë për të na furnizuar me një kontigjent të ri nafte, por s’kemi marrë asnjë përgjigje’, thotë drejtori i shkollës, Krenar Bazaiti, duke theksuar se kjo është një situatë e vështirë pasi temperaturat janë ulur ndjeshëm dhe nxënësit nuk e përballojnë dot të ftohtin.
Disa ditë më parë ArgjiroLajm.net raportoi për një tender për blerje nafte nga Bashkia Gjirokastër në vlerën rreth 147 milionë lekë të vjetra me TVSH, por sot jemi para faktit se shkollat nuk kanë lëndë djegëse për të ngrohur klasat. Mbase kryebashkiakja Zamira Rami dhe vartësi i saj që drejton agjencinë përgjegjëse për këto shërbime, kanë menduar t’i furnizojnë shkollat me naftë në pranverë, atëherë kur temperaturat rriten dhe praktikisht s’ka më nevojë për të ndezur kaldajat.
©ArgjiroLajm.net
