Një ndër lojtarët më të dalluar në sezonin e fundit te Kukësi, ishte mbrojtësi Rustem Hoxha i cili ishte edhe ndër lojtarët me më shumë minuta te verilindorët. Në merkatos e verës, ai u largua duke firmosur në Gjirokastër me Luftëtarin. Në një intervistë për “VIP Sport”, Hoxha ka folur në lidhje me arsyet që e bindën të firmosë me bluzinjtë, ndërkohë që pranon se Mezani ka sjellë edhe ndryshim në aspektin psikologjik.
Çfarë të bindi të firmosje në Gjirokastër, duke ditur dhe formën jo të mirë të skuadrës?
Ekipi kishte zhvilluar ndeshje të mira dhe kjo gjë më jepte besim që mund të zhvillonim një kampionat pozitiv plus serioziteti dhe besimi që kishin drejtuesit te unë.
Çfarë ambienti gjete në Gjirokastër dhe çfarë nuk po ecte me ekipin?
Gjeta një ambient të mirë ku më kanë pritur ngrohte dhe kjo gjë më ka ndihmuar që të përshtatem shpejt me skuadrën. Pavarësisht pikëve të munguara javët e para, ekipi ka zhvilluar ndeshje të mira por mos marrja e pikëve krijon një ngërç psikologjik.
Fitorja e parë në javën e pestë. A është pika e kthesës kjo për Luftëtarin?
Kjo fitore ishte e rëndësishme për vazhdimësinë e tani duhet të punojmë më shumë që të rikuperojmë pikët e lëna në javët e para. Me ardhjen e profesor Mezanit dhe fitoren e djeshme besoj qe e kemi kaluar.
Çfarë ka ndryshuar Mezani që solli edhe fitoren e parë?
Profesori nuk kishte shumë kohë që të ndryshonte ndonjë gjë nga ana fizike apo taktike, por u mundua që të punonte më shumë nga ana psikologjike dhe besoj se ia arriti qëllimit
Objektivat e këtij sezoni?
Duhet të shohim gjithmonë ndeshjen e radhës, t’i marrim maksimumin pasi vetëm kështu përmirësohemi dhe ne fund te kampionatit arrijmë te suksesi.
