Bashkia Gjirokastër ka vendosur të largojë tregun e mallrave të përdorura të romëve aty ku ka qenë prej vitesh. Vendimi u mor ditët e fundit, ndonëse nuk është gjetur një zgjidhje tjetër alternative për ta, edhe pse bashkia ka thënë se është duke kërkuar t’i sistemojë diku tjetër. Sot Tv Gjirokastra ka transmetuar një kronikë për këtë problem, ku flasin edhe vetë disa prej tregtarëve.
Dy prej tyre përmendën një detaj që s’i bën nder Bashkisë Gjirokastër. Tregtarët thanë se i ka shkuar nënkryetarja apo nënkryetari i Bashkisë (nuk kuptohet qartë nga rrëfimi i tyre) dhe iu ka kërkuar çertifikatën për të vërtetuar se kush është gjirokastrit do të lejohet të shesë, ndërsa të tjerët do të largohen. Kjo është e turpshme dhe një gafë e patolerueshme.
Pra, nëse je rom me çertifikatë në Gjirokastër, lejohesh të vijosh aktivitetin si tregtar. Kush është rom i ardhur, do të zbohet nga tregu. Çfarë logjike e mbrapsht është kjo që ka zgjedhur Bashkia Gjirokastër? Nëse tregu transferohet prej aty, do të bëhet njësoj për të gjithë. Nuk mund të ketë trajtim të tillë të diferencuar.
Mes atyre romëve që punojnë në atë treg ka edhe të ardhur nga rrethet e tjera të vendit, të cilët ushtrojnë aktivitetin e tyre në Gjirokastër prej vitesh ndonëse mund të kenë gjendje civile në një qytet tjetër. Nëse Bashkia Gjirokastër e ka ndarë mendjen t’i largojë prej aty, duhet t’i sistemojë në një vend tjetër së paku. Jo më pastaj të veprojë “pisët” duke i trajtuar ca të nënës e disa të njerkës. Shihni më poshtë kronikën e TV Gjirokastra.
©argjiroja.net
