Në Gjirokastr duket se këtë sezon janë të prirur që t’i përkushtohen infrastrukturës. Luftëtari shumë shpejt do të ketë një fushë të re stërvitore me të gjitha kushtet bashkëkohore. Me një investim të përbashkët të klubit Luftëtari, FSHF-së dhe Bashkisë së Dropullit, fusha stërvitore e Dervicianit do të ketë të gjitha kushtet e duhura që futbollistët të kryejnë stërvitje normale.
Drejtori teknik i skuadrës së Luftëtarit, Vangjel Çavo për RTSh sport ka pohuar: “Fusha do të jetë me bar natyral, do të ndërtohet një palestër për të kryer seancat e forcës etj. Punimet për të përfunduar fushën stërvitore do të kryhen në tri faza. Fillimisht është hapur pusi, për të ujitur fushën dhe të ketë ujë të bollshëm në ambientet e brendshme.
Është korrur bari i mëparshëm dhe fusha po përgatitet që muajin e ardhshëm të mbillet me bar natyral. Aty do të vendosen edhe projektorë që në muajt e nxehtë të verës të kryhet stërvitja edhe në orët e mbrëmjes. Ka ardhur momenti që të stërvitemi në fushë me bar natyral, duke qenë se përgatitjet vazhdimisht në tapetin artificial sjell edhe dëmtime për lojtarët”, – tha drejtori teknik i skuadrës bluzi Vangjel Çavo.
