“Karaibet e panjohura evropiane”. Udhëtimi në Shqipëri ofron akomodim për shtatë netë, që mund të jetë në plazh ose turne të planifikuara që përfshijnë vizita kulturore, kjo është oferta më e fundit e rekomanduar nga një agjenci turistike në Spanjë, sipas të përditshmes spanjolle “El HuffPost”.
Presidenti i Shoqatës së Agjencive të Udhëtimeve Albacete, Ignacio Tárraga tha se agjencia ofron fluturime direkte nga provinca Albacete, Spanjë drejt Tiranës.
Turistët spanjollë ishin të shumtë në numër gjatë 2023 në vendin tonë. Që prej vitit 2022 numri i vizitorëve spanjollë është shumëfishuar dhe është shtuar një linjë e re Tiranë – Madrid.
Ka disa arsye pse Shqipëria njihet si një nga destinacionet e krahasuara me “Karaibet e panjohura evropiane”.
Së pari, Shqipëria ka një vijë bregdetare më shumë se 300 kilometra të gjatë, me plazhe me rërë të bardhë, ujëra të kristaltë dhe shkëmbinj të thepisur.
Së dyti, është një vend relativisht i panjohur. Së treti, Shqipëria është një vend i përballueshëm. Çmimet për hotelet, ushqimin dhe aktivitetet janë shumë më të ulëta se destinacionet turistike të Karaibeve.
Kjo e bën atë një opsion tërheqës për udhëtarët që kërkojnë të kursejnë para.
