Mediat greke më në fund gjetën ngushëllim tek një shqiptar, i cili e quan ‘hero’ ekstremistin Kostandin Kacifas, 35-vjeçarin nga Bularati që terrorizoi fshatin me armë dhe qëlloi policinë me snajper, duke iu rrezikuar jetën. Ai është gazetari nga Gjirokastra, Telnis Skuqi. Në një lidhje telefonike nga Norvegjia për televizionin grek Star News, Skuqi shprehet kështu:
“Kacifas ishte heroi i tyre, absolutisht po. Edhe për mua është hero. Guxoi të kthehet në tokën e tij, të kthehet në vendin e tij, të dashurojë flamurin e tij, të dashurojë vendin e tij. Nuk e braktisi”.
Pra, sipas gazetarit nga Gjirokastra, Kostandin Kacifas guxoi të kthehej në Bularat, a thua se e kishte ndaluar dikush të jetonte në fshatin e tij apo të mbante flamurin grek.
Më tej Skuqi i thotë televizionit grek se në Shqipëri kanë mbetur vetëm njerëz të edukuar keq, ndërsa ata më të aftët janë larguar. Me siguri që këtu përfshin edhe veten e tij.
“Në Shqipëri kanë ngelur njerëzit e keqedukuar, të cilët kryeministri i ka më kollaj për t’i manipuluar. Rama nuk ka besë, është i çmendur”, shprehet Skuqi.
Ditën e parë të ngjarjes, pra më 28 tetor, në një postim në Facebook, Skuqi e cilësonte si ‘idiot’ Kostandin Kacifasin, ndërsa ditën kur u zhvillua ceremonia mortore ndryshoi qëndrim dhe e shpalli ‘hero’. Shprehej gjithashtu se ‘grekët dinë të respektojnë jetën, dinë dhe të protestojnë, ndërsa ne shqiptarët dimë vetëm të lëpihemi’.
Me pak fjalë, o sa mirë sikur të ishim të gjithë grekë, se po të jesh shqiptar, siç është edhe Skuqi, qenka mallkim i madh. Kjo është logjika e mbrapshtë. Natyrisht që Telnis Skuqi është në të drejtën e tij të ndryshojë qëndrim për këtë çështje. Ka gjithashtu edhe lirinë të ‘çojë ujë’ në llumin e propagandës që mediat greke bënë me ngjarjen në Bularat, por nëse policia shqiptare do t’i kishte rënë kot në qafë Kostandin Kacifasit, të jeni të sigurt që Athina zyrtare do të kishte bërë namin.
Nuk do të kishim atë qëndrim që dimë të gjithë, por shumë herë më të ashpër. Qeveria greke është treguar e kujdesshme sepse e di të vërtetën e kësaj çështje, e di që Kacifas ishte një ekstremist dhe u ekzekutua pasi refuzoi të dorëzohej. Në këtë mënyrë mund të ekzekutohesh kudo tjetër, sikundër ekzekutoi policia greke në Janinë shqiptarin nga Delvina, Altin Mullaj disa ditë më parë. Kacifas nuk u ekzekutua se ishte minoritar, por u vra si një ekstremist që refuzoi për rreth 4 orë të dorëzohej te policia, duke qëlluar vazhdimisht në drejtim të tyre. Shini në videon më poshtë deklaratat e gazetarit Skuqi.
© ArgjiroLajm.net
