Në prag të nisjes së vitit të ri akademik, Ndërmarrja e Trajtimit të Studentëve në Gjirokastër do të kryejë një rikonstruksion të tualeteve në konviktin e djemve. Investimi kap vlerën e rreth 10 milionë lekëve të vjetra, ndërsa punimet do të kryhen nga firma ‘Bilibashi Sh.p.k’, me adresë në Libohovë. Ky është tenderi i parë që zhvillohet nga kjo ndërmarrje që prej kohës kur në krye të saj u emërua Doriana Demo.
Kjo e fundit është përfshirë shpesh në akuza publike për paraardhësin e saj në këtë institucion, Nikolla Buka. Demo e ka akuzuar atë për abuzim me tenderin e dyshekëve, si dhe u zotua se do ta çonte në Prokurori. Po kështu nga zyra e saj, ‘rrodhi’ në media edhe raporti i auditit i Drejtorisë së Inspektimit Financiar në Ministrinë e Financave, sipas së cilit është konstatuar një abuzim financiar në vlerën e rreth 35 milionë lekëve të vjetra nga ish-drejtuesi i këtij institucioni, Nikolla Buka dhe dy punojnëse të tjera.
Por përtej kësaj përplasje mes Demos dhe paraardhësit të saj, mbetet për t’u parë nëse ajo do të jetë ndryshe nga Nikolla Buka, kur vjen puna tek menaxhimi i fondeve publike, apo do të vazhdojë në linjën e tij. E themi këtë sepse ka zëra që flasin për paga stratosferike të punonjësve në Ndërmarrjen e Trajtimit të Studentëve në Gjirokastër, duke nisur që me pagën e vetë drejtoreshës. ArgjiroLajm.net do të trajtojë këtë çështje në ditët e ardhshme, duke ofruar më tepër detaje për publikun. Më poshtë dokumentat e tenderit për rikonstruksionin e tualeteve.
© ArgjiroLajm.net
