Tani nuk ka më asnjë dyshim. Luftëtari është zhytur në krizë. Humbja në ndeshjen e parë të Superligës përballë Kastriotit që vinte nga Kategoria e Parë nuk ishte rastësi. As humbja në transferën e Laçit nuk ndodhi kot. Humbja e tretë radhazi sot përballë Flamurtarit i ‘vuri kapakun’ dhe konfirmon krizën në ekipin gjirokastrit. Suksesi i sezonit të kaluar mbetet tashmë një ‘deja vu’.
Rënia e lirë e Luftëtarit nisi me largimin e Hasan Likës, arkitektin që e kualifikoi në Europa League. Më pas erdhën pazaret në ndeshjet e kompeticionit ku klubi gjirokastrit kualifikohej për herë të parë. Luftëtari pësoi humbje të thellë si brenda ashtu edhe jashtë. Shenjat për trukime ndeshjesh ishin evidente. Ndonëse zyrtarisht presidenti Tavo ka thënë se nuk ka probleme financiare, zërat rreth ekipit konfirmojnë të kundërtën. Por edhe sikur të jetë ashtu siç thotë Tavo, pra që nuk ka probleme me pagesat, në klub mungon klima pozitive. Është një gjendje gati e nderë që demotivon këdo.
E gjithë kjo përkthehet në rezultat negativ. Ja tek jemi, tre javë pas nisjes së kampionatit dhe Luftëtari ka regjistruar tre humbje radhazi. Eksperimeti i Tavos me trajnerin Kostiç, për të cilin largoi Hasan Likën, është i dështuar dhe gjendja zor se ka shpresë për t’u rregulluar. Së paku nëse Tavo nuk e shkarkon trajnerin Kostiç, ky i fundit duhet të japë dorëheqjen dhe klubi të përzgjedhë një tjetër emër. Sa i përket objektivave për këtë sezon, mbase duhet të fillohet të mendohet për mbijetesën dhe t’i harroni kupat e Europës. Kështu ju sugjeronte edhe legjenda Dhori Kalluci, i cili e njeh klubin shumë herë më mirë sesa Grigor Tavo dhe Kostic.
© ArgjiroLajm.net
