Emergjencat Civile kanë dhënë alarmin një ditë më parë për rrezikun e përmbytjeve nga reshjet e dendura të shiut që priten gjatë 24 orëve të ardhshme. Situata do të jetë më problematike në jug të vendit. Gjirokastra është një nga qarqet ku reshjet do të bien me intensitet të lartë. Prefekti i qarkut Astrit Aliaj do të zhvillojë sot mbledhjen e shtabit të emergjencave civile, ku do të diskutohet për masat që do të merren për përballimin e situatës.
Në njoftimin e përcjellë në media një ditë më parë,Emergjencat Civile bënin të ditur se duke iu referuar IGJEUM dhe institucionet ndërkombëtare të monitorimit të përmbytjeve për Evropën kërkonte marrjen e masave pasi pritej që rreshjet e shiut të arrinin vlera mnaksimale e 100 mm gjatë 24 orëve.
Në njoftimin e saj Emergjencat Civile udhëzonin në mënyrë të veçantë të gjithë Prefektët e qarqeve, drejtuesit e bashkive, drejtuesit e institucioneve qendrore rajonale dhe vendore, për marrjen e masave urgjente për sigurimin e kushteve për jetën normale të komunitetit, të cilët duhet të kryejnë këto veprime:
– Të mbledhin urgjentisht Komisionin e Planifikimit dhe Përballimit të Emergjencave Civile (Shtabin e Emegjencave Civile) në rang qarku dhe bashkie duke dhënë detyra për çdo institucion që ka përgjegjësi për emergjencat civile, dhe këto të vënë në gatishmëri të gjitha kapacitetet njerëzore e teknike operacionale për të reaguar sipas situatës.
Ndërsa përcaktoheshin një sërë detyrash për institucionet, përcaktohej qartë edhe diçka e rëndësishme, por që po lihet në heshtje, njoftimi i qytetarëve.
Emergjencat Civile linin këtë detyrë në njoftimin e saj zyrtarë që sigurisht do t’u ketë shkuar edhe institucioneve vendore.
– Të marrin masa për njoftimin e komunitetit të tyre që t`i bindet lajmërimit të strukturave të pushtetit vendor dhe qendror për të shmangur qarkullimet e panevojshme, për minimizimin e lëvizjeve të shumta të popullatës dhe sidomos e fëmijëve të mitur të pa shoqëruar nga të rriturit, si dhe të japin ndihmesën e tyre ndaj këtyre strukturave, kjo sipas detyrimeve të parashikuara në Ligjin nr. 8756, ‘’Për Emergjencat Civile’’.
