Gjirokastritët mblidhen në Athinë, festë dhe këngë polifonike në ambasadë (FOTO)

Ambasada shqiptare në Athinë kishte organizuar një takim me një komunitet gjirokastritësh që jetojnë e punojnë në kryeqytetin grek. Ky ishte takimi i parë i një cikli që do të vijojë edhe me komunitete nga qytete të tjera të Shqipërisë.

“Takimi me gjirokastritët që jetojnë e punojnë në Athinë na dha emocione të bukura si dhe krijoi një frymë të mirë angazhimi brenda komunitetit e bashkëpunimi për të forcuar lidhjet me vendin, ama edhe duke shkëmbyer informacion për projekte apo nisma të qeverisë shqiptare”, shkruan ministrja e Turizmit, Mirela Kumbaro e pranishme gjithashtu në takim bashkë me kryebashkiakun Flamur Golemi.

“Bashke me ambasadoren Luela Hajdaraga ndamë bashkë edhe lajme të mira për punë të bukura nga Gjirokastra jonë dhe për lidhjen e tyre me projektet që bashkëatdhetarët tanë po zhvillojnë në Greqi për kulturën dhe artin shqiptar, për të mbajtur gjallë traditën tonë dhe për shtuar bashkëpunimet me atdheun që përkthehet në më shumë ekonomi dhe zhvillim për vendin tonë”, vijon më tej Kumbaro teksa publikon edhe foto nga takimi i organizuar në ambasadë, ku nuk mungojnë as veshjet popullore, këngët labe e ushqimet tradicionale. ©Argjiroja.net