Dinamo e këtij sezoni ka pasur oshilacione të shumta duke humbur vendin e katërt në klasifikim edhe pse ka shumë javë të mbetura deri në fund të kampionatit.
Të besuarit e Dajës duhet të bëjnë më të mirën në fazën e fundit të kampionatit, për të shpëtuar sezonin dhe pse jo për të mbyllur vitin me trofe duke qenë se gara në Kupën e Shqipërisë është ende e hapur. Faza e tretë ka qenë dështim për Dinamon në çdo aspekt ku veç pikëve të pakta që ka grumbulluar, u kthye gjithashtu në një skuadër që nuk shënonte dhe pësonte shumë.
Kështu, Dinamo e mbylli fazën e tretë me vetëm 4 gola të realizuar, gola nga të cilët arriti të merrte vetëm 5 pikë. Sa i përket golave të shënuar, Dinamo pësoi plot 10 duke qenë totalisht jashtë pritshmërive. Deri në muajin janar, Dinamo ishte skuadra me sulmin më të mirë në Superiore, madje arriti të shënonte edhe 6 gola në një ndeshje, në fitoren 6-2 kundër Tiranës.
Por këto statistika tashmë kanë mbetur mirazh, pasi sulmi i Dinamos nuk po prodhon më gola dhe po kalon një moment të vështirë. Në fazën e tretë, blutë realizuan 2 gola ndaj Vorës për fitore, një ndaj Flamurtarit dhe një tjetër ndaj Tiranës për të marrë dy barazime.
