Emisioni Uniko nga Spartak Koka në Klan Plus hyri brenda shtëpisë së Klodian Çalamanit, 38-vjeçarit që vrau dhe groposi në oborrin e banesës 8-vjeçarin Mateo Vasiu.
Në momentin që grupi i xhirimit të emisionit Uniko ndodhej jashtë banesës së Çalamanit, aty u shfaqën familjarët e Mateos së vogël, të cilët u futën brenda shtëpisë së 38-vjeçarit.
Të dëshpëruar dhe të mllefosur nga ngjarja e rëndë, ata kërkonin për prova të tjera në vendin e ngjarjes, në cepin e oborrit të shtëpisë së Çalamanit ku ky i fundit kishte groposur Mateon e vogël.
Prindërit enden nga njëri cep në tjetrin duke kërkuar për prova të tjera. Por policia që kishte qenë aty ditë më parë, kishte mbledhur të gjitha provat.
Klodian Çalamani është arrestuar dhe akuzohet për vrasjen e 8-vjeçarit Mateo. Për elemente sigurie, ai është transferuar në paraburgimin e Vlorës. Autoritetet e kanë larguar atë nga Fieri pas revoltave dhe protestave të familjarëve të Mateos, të cilët kërkojnë rikthimin e dënimit me varje për autorin.
Krimi i rëndë ndodhi të martën e 16 Nëntorit në fshatin Grecalli të Fierit. Klodian Çalamani kishte goditur me sende të forta në kokë 8-vjeçarin dhe më pas e groposi në oborrin e shtëpisë.
Ndërkohë, tezja e Mateos ka hedhur dyshime të forta lidhur me një grua të implikuar në këtë ngjarje.
Kjo ka bërë që mamaja e tij të depozitojë një pedi në Policinë e Fierit, nisur edhe nga dëshmitë thuajse të ngjashme të gruas dhe Çalamanit para grupit hetimor.
Vetë familjarët, janë angazhuar për grumbullimin e sa më shumë detajeve dhe zbardhjen e kësaj ngjarje.
EMISIONI I PLOTË:
