Hakmarrja është një pjatë që shërbehet gjithmonë e ftohtë! Me siguri që këtë është duke menduar kryebashkiakja e Gjirokastrës teksa po bën llogaritë se si po e humbet shumicën në Këshillin Bashkiak. Kjo do të thotë se viti i saj i fundit në krye të Bashkisë Gjirokastër do të vështirësohet shumë, pasi nuk ka votat e duhura për të kaluar vendimet që ajo do. Është e detyruar që të bëjë kompromis, në mos pazar, me PS-në, e cila po shkon drejt krijimit të shumicës në Këshillin Bashkiak të Gjirokastrës. Dy këshilltarët e sotëm që ikën drejt PS-së me siguri nuk do të jenë të fundit. Pritet të ketë largime të tjera nga radhët e LSI-së dhe PD-së, aq sa grupimi i këtyre dy forcave të ngelet pakicë. Por çfarë fshihet pas këtyre lëvizjeve?
Thjesht Zamira Rami është duke vuajtur pasojat e vendimeve, jo vetëm të saj personalisht, por edhe të mentorit politik që ajo ka, Vangjel Tavos. Pak kohë më parë Rami largoi dy administratorët e PS-së nga njësia administrative Cepo dhe Lazarat. Largimet ishin të motivuara politikisht. Edhe LSI në këtë rast e donte të gjithë ‘tepsinë’ e Bashkisë Gjirokastër për vete. Por këto lëvizje nisën nga ana tjetër një ‘hakmarrje’ prej PS-së, e cila po shkon drejt krijimit të shumicës në Këshillin Bashkiak. Aktualisht PS ka 14 këshilltarë, bashkë me dy ‘blerjet’ e sotme, ndërsa LSI dhe PD kanë 17 këshilltarë.
Por ka gjasa merkato e këshilltarëve të vazhdojë, aq sa Zamira Ramit nuk i bën më punë as aleanca e krijuar rishtaz me PD-në, parti me të cilët është gati të ndajnë edhe pushtetin në Bashkinë Gjirokastër. Madje ka zëra që flasin për një listë njerëzish nga radhët e PD-së, të cilët do të emërohen në administratën e Bashkisë Gjirokastër nga Zamira Rami. Të presim!
©ArgjiroLajm.net
