Hansi Flick, trajneri i Barcelonës, në mbrëmjen gala të organizuar nga Mundo Deportivo, nuk u fsheh, por shprehu më zë të fortë dhe të qartë objektivat e ekipit të tij këtë sezon. Tekniku i Barçës e nisi nga Superkupa, nga trofeu i parë që fituan këtë sezon:
“Të fitosh titullin e parë është fantastike, për më tepër kundër Real Madrid. Në fund të fundit, ne jemi Barcelona dhe duhet të luftojmë për gjithçka. Kemi mundësinë për të konkurruar për çdo trofe, kjo është ajo që duam”, u shpreh Flick.
Tekniku gjerman u pyet edhe në lidhje me objektivin më të rëndësishëm, Champions League: “Ne po punojmë për t’u përmirësuar çdo ditë. Duhet të kujdesemi për çdo detaj, por po, kemi mundësinë për të fituar Champions League. Është një objektiv shumë i rëndësishëm dhe punojmë çdo ditë për të”, theksoi Flick.
Në fund, Hansi Flick bëri dhe një koment në lidhje me aventurën e tij në Barcelonë: “Baça është më shumë se sa e imagjinoja. Që në ditën e parë jam ndjerë sikur isha pjesë e familjes. Personat këtu janë të jashtëzakonshëm, është fantastike kjo që po përjetoj”, u shpreh Flick.
