Një histori tronditëse është denoncuar në Sarandë nga një 17-vjeçare, e cila akuzon se krushku 72 vjeçar e ka abuzuar për disa vite. Ky i fundit ka pranuar në polici marrëdhënien, por sipas tij ka qenë me dëshirë. I moshuari pritet të dalë në vijim para gjykatës, ndërsa vajza është dërguar për rehabilitim.
Një histori abuzimi seksual me një të mitur ka tronditur Sarandën. Një denoncim për abuzim seksual ka mbërritur në komisariatin e policisë Sarandë nga një 17-vjeçare.
E mitura pretendon se 72-vjeçari ka abuzuar disa herë me të, ndërsa i moshuari në dëshminë e tij ka pranuar se akti seksual mes tyre është kryer me dëshirë nga të dyja palët. Blutë e Sarandës njoftuan mbrëmjen e së martës arrestimin e Bajram Tushës, ndaj të cilit u ngrit akuza e marrëdhënieve seksuale me dhunë me të mitur.
Sipas dëshmisë së vajzës, abuzimi është shtrirë në disa vite, por ajo kishte nguruar ta denoncojë për shkak të lidhjes mes dy familjeve. I moshuari i vënë në pranga është vjehrri i motrës së saj.
Historia e abuzimit sipas pretendimeve të vajzës ka nisur kur ajo dhe familja e saj vajtën të jetojnë në një shtëpi me qira të ofruar nga ky i fundit. Ajo ka dëshmuar se në shenjë falenderimi ajo dhe nëna e saj në vazhdimësi shkonin të ndihmonin burrin që jetonte i vetmuar pasi gruaja i ka ndërruar jetë, ndërsa fëmijët i jetojnë jashtë.
Për shkak të lidhjeve mes familjeve dhe frikës së familjarët nuk do ta besonin ajo ka thënë se ka hezituar ta denoncojë, por është bindur së fundmi e mbështetur nga një djalë me të cilin po shkonte drejt fejesës.
72-vjeçari nga ana tjetër ka pranuar në polici se ka kryer marrëdhënie me denoncuesen, por ka mohuar ta ketë detyruar. Në funksion të hetimit, policia e Sarandës ka marrë në pyetje edhe disa të moshuar të tjerë të dyshuar, por ata kanë mohuar akuzat. I moshuari pritet të dalë në vijim para gjykatës, ndërsa vajza mësohet se është dërguar në një qendër rehabilitimi./ Ora News
