Vajza që shihni më poshtë në fotografi ishte viktima e parë e tërmetit katastrofik, që goditi Shqipërinë mëngjesin e djeshëm, duke lënë pas të paktën 31 të vdekur e qindra të plagosur, si dhe duke shkatërruar totalisht shumë ndërtesa.
Bëhet fjalë për 25-vjeçaren Kristi Reçi, studente e Mjekësisë, e cila u nxor dje e pajetë nga rrënojat. 25-vjeçarja ka vdekur nga tërmeti së bashku me familjarët e saj, vëllanë 22-vjeçar, dhe të dy prindërit. Kristi ishte e afërme e djalit të kryeministrit Edi Rama, Greg Rama.
Ky i fundit ngushëlloi sot familjarët e të prekurve nga tërmeti, ndërsa tha se mes viktimave ishte dhe njeriu i tij i afërt, bashkë me familjarët. “Mes viktimave të shumta nga kjo fatkeqësi natyrore edhe një njeriu im i afërt së bashku me vëllanë e saj, mamin dhe babin janë gjetur nën rrënoja.
Vetëm dy trupa janë nxjerrë deri tani nga gërmadhat e asaj që u shpall ditë zie kombëtare. Ngushëllimet e mia shkojnë për të gjithë viktimat e kësaj fatkeqësie”, shkruante djali i Edi Ramës pa dhënë emra, por tashmë është mësuar se e afërme e tij ishte pikërisht 25-vjeçarja Kristi Reçi. / BW
