Presidenti i Federatës Shqiptare të Futbollit, Armand Duka, në një intervistë për Sport News në News 24, pasi analizoi sezonin, i dha një përgjigje të gjithë atyre që janë të pakënaqur për çmimet e biletave.
Në bisedën e bërë me Trevisa Tufën për shortin me biletat, Duka thekson faktin se synimi është shpërndarja e barabartë e tyre dhe për momentin, nuk ka ndonjë mënyrë tjetër për të arritur diçka të tillë.
President, dukesh i qetë, në formë, ishte ky një vit pozitiv? A fitoi shumë të ardhura FSHF?
Unë mendoj se kjo është diçka pozitive, çdo vit rritet niveli i të ardhurave dhe rrjedhimisht ka edhe më shumë biznes.
Sfida më e madhe, të paktën për organizimin mendoj se ishte ndeshja me Serbinë. A patët frikë për një moment? Ose çfarë do veçoje?
Nëse do ta vlerësoja nga 1-10, do i jepja notën 7. Impenjimi ka qenë maksimal. Impenjimi ka qenë maksimal nga Policia e Shtetit dhe të gjithë. Thashë, 70 përqind është realizuar mirë.
Besoj se edhe këtu keni fituar shumë si Federatë. Të ardhura financiare, por dhe një imazh i mirë në UEFA dhe FIFA. Megjithatë duket sikur po humbasim tifozët president. Ka shumë pakënaqësi për çmimet e biletave. Si do ta zgjidhni këtë pjesë, shortin me biletat apo edhe çmimet e shtrenjta…
Padyshim që do ketë njerëz të kënaqur dhe të pakënaqur. Rëndësi ka që të gjithë të kenë shanse të barabarta për të qenë në stadium. Çmimet janë çështje tregu, nëse tregu i pranon, kërkesa është e madhe .Për të qenë burrë i mirë, mund t’i bëjmë biletat pa lek, por ky ekipi jonë nuk jeton dot pa lek. Ne marrim zero lek nga të gjithë. Të vetmet burime që tentojmë të bëjmë diçka, është që të kemi të ardhurat nga biletat, të drejtat televizive dhe nga sponsorat, të cilët i kemi 100-fishuar.
Për të qenë populist, do doja që të ishin me zero lek. Sot nuk dijmë një mënyrë tjetër për të qenë të paanshëm. E di që kjo disa i lëndon, e di që ka grupe që kanë mbështetur kombëtaren gjithmonë, por tashmë kjo do të vazhdojë kështu.
(J.S/BalkanWeb)
