Disa banorë të lagjes “Meçite” i janë drejtuar me një peticion Fondit Shqiptar të Zhvillimit dhe Bashkisë Gjirokastër, ku shprehin shqetësimin mbi punimet që po kryhen në një pjesë të projektit për “Rivitalizimin e Sheshit “Çerçiz Topulli”. Në letrën e tyre mes të tjerash thuhet se “në hapësirën përreth sheshit të Qendrës Kulturore “Fato Berberi”, e cila është pjesë integrale e projektit të mësipërm, është krijuar një barrierë fizike në përmasa të atilla që pengon mobilitetin e lëvizjes së banorëve në shtëpitë përreth, pengon ndërhyjet e shërbimit zjarrfikës në raste emergjencash apo kalimin e autoambulancës, si dhe izolon nga ana vizuale disa banesa”
Konkretisht shkruajnë banorët, “bëhet fjalë për një mur të lartë në formën e një rambe të çuditshme, që në gjykimin tonë nuk sjell asnjë vlerë të shtuar për projektin në tërësi e as për qendrën kulturore aty pranë, por përkudrazi nuk është as funksionale për ne banorët e lagjes. Në mënyrë të veçantë sidomos për një prej banesave më të afërta, muri gjigant e izolon komplet fasadën dhe bllokon hyrjen e shtëpisë”.
Më tej theksohet se ky peticion është në vijim të disa ankesave me shkrim, por edhe përmes postës elektronike që i janë dërguar Bashkisë Gjirokastër dhe Fondit Shqiptar të Zhvillimit veçmas nga banorë të kësaj lagje.
“Lutemi të merrni në kosideratë këtë shqetësim për të rishikuar projektin duke e hequr rambën gjigante, bllokuese e aspak funksionale për komunikimin e lagjes tonë me pjesën e sipërme të sheshit. Duam t’ju bëjmë me dije gjithashtu se, në kushtet kur edhe ky peticion do të injorohet nga institucioni juaj, ne do t’i drejtohemi Bankës Botërore si financuese e këtij projekti e po kështu do të bëjmë kallëzim në organet e drejtësisë. Duam të besojmë se forca e arsyes do të fitojë dhe shqetësimi ynë komunitar do të adresohet siç duhet pa cënuar në asnjë moment projektin në tërësi e duke mos e mohuar aspak dobinë e tij publike për qytetin e Gjirokastrës”, shkruajnë banorët në peticionin e tyre. ©Argjiroja.net
