Bindja Demokratike, partia më e re në vend që për momentin ka koordinator Astrit Patozin dhe një këshill drejtues nga njerëz të angazhuar më parë me Partinë Demokratike do të ketë kandidatët e vet në 61 bashkitë e vendit. Këtë e konfirmoi edhe vetë Patozi tre ditë më parë. Por kush mund të jetë kandidati i saj në Bashkinë Gjirokastër? Burime të Argjirolajm.net thonë se emri më i mundshëm është Niko Zhulla, ish-drejtor i spitalit “Omer Nishani” dhe ish-drejtori i Tatimeve në Gjirokastër gjatë kohës kur në pushtet ishte Partia Demokratike.
Zhulla ka një përvojë të gjatë në administratën publike, duke nisur nga puna në Doganë deri tek drejtimi i institucioneve të rëndësishme në Gjirokastër. Megjithatë, thonë burimet, Zhulla heziton për momentin të shfaqet si kandidat pasi pret çfarë do të ndodhë me palën kundërshtare, PS-në. Në rast se socialistët do të shkojnë në zgjedhje me Flamur Golemin, Zhulla nuk hyn në garë sepse në llogaritë e tij ka pak gjasa që të fitojë, thanë më tej burime të afërta me ish-drejtorin.
Nëse PS vendos Artemis Malon ose Armand Hilajn, Zhulla pritet të jetë kandidati i Bindjes Demokratike. Mentori i tij politik në këtë lëvizje është edhe ish-deputeti Vangjel Tavo, me të cilin Zhulla ka një miqësi të hershme. Bindja Demokratike ka për të qenë thjesht një ‘çengel’ ku Zhulla do të ‘varë’ kandidimin formalisht në KQZ, ndërsa pas tij janë patjetër Vangjel Tavo dhe sigurisht njerëz të tjerë nga radhët e PD-së me të cilët ai ka bashkëpunuar gjatë kohës kur drejtonte Spitalin apo Tatimet në Gjirokastër.
Edhe pse PD formalisht thotë se nuk do të marrë pjesë në zgjedhje, në një formë ose në një tjetër elektorati dhe strukturat e saj do të përfshihen në fushatë, qoftë edhe në mënyrë okulte duke mbështetur kandidatët e Bindjes Demokratike. Lëvizjen e Niko Zhullës do ta mësojmë sapo PS të vendosë mes Artemis Malos, Flamur Golemit apo Armand Hilajt. Megjithatë edhe nëse Zhulla nuk hyn në garë, do të gjendet një person tjetër përballë kandidatit të socialistëve. PS pritet t’i zyrtarizojë emrat në mbledhjen e Asamblesë Kombëtare më 11 Maj.
©argjiroja.net
