Ish-kryeministri i Greqisë, Kostandinos Karamalis, ka qenë së fundi për një vizitë në Shqipëri. Mësohet se ai është ndalur në disa zona në qarkun e Vlorës dhe Gjirokastrës. Kryebashkiaku i Dropullit, Dhimitraq Toli, ka publikuar dy foto nga takimi me Karamalis.
“Takimi me zotin Karamanlis u zhvillua në kuadër të një vizite private që kryen bashkë me familjen e tij, në disa bashki të Qarkut të Gjirokastrës dhe të Qarkut të Vlorës. Gjatë bisedës shkëmbyen mendime për zgjidhjen e problemeve imediate, me të cilat përballet populli i Dropullit dhe i Pogonit, si dhe nevojën për mbështetje nga Qeveria Greke, si për përmirësimin e infrastrukturës në bashkinë tonë, ashtu edhe për të ndihmuar banorët e moshës së tretë që banojnë në fshatrat tona”, thotë Toli.
Aktualisht Kostandinos Karamalis është deputet i Kuvendit të Greqisë nga partia Demokracia e Re. Kujtojmë se në vitin 2009 kur ishte kryeministër ai ka qenë në Shqipëri për vizitë zyrtare bashkë me ministren e Jashtme asokohe, Dora Bakojanis, për të nënshkruar në Tiranë me Berishën e Bashën marrëveshjen për kufirin detar, marrëveshje e cila më pas u rrëzua nga Gjykata Kushtetuese e Shqipërisë. ©argjiroja.net
