Luftëtarin e pret një ndeshje shumë delikate të dielën ndaj Skënderbeut, por në klubin bluzi janë të bindur se do të ndalin vrullin e korçarëve. Në fakt, si për ironi të fatit, synimi i gjirokastritëve për të blinduar vendin e katërt dhe marrë pjesë në Ligën e Europës varet nga Skënderbeu. Nëse korçarët fitojnë Kupën e Shqipërisë dhe Luftëtari mbyll kampionatin i katërti, atëherë siguron pjesëmarrjen në Europë.
Në të kundërtën, një humbje e Skënderbeut në finalen ndaj Tiranës pret shpresat e Luftëtarit për Europën. Megjithatë, të dielën në stadiumin “Gjirokastra” është një tjetër histori dhe Luftëtari do të kërkojë të marrë një rezultat pozitiv ndaj kampionëve në fuqi. Mbrojtësi Lejdi Liçaj, i cili 8 vite më parë ka qenë pjesë e Skënderbeut, foli me optimizëm për “Panorama Sport”. Ai mendon se ndaj korçarëve do të luhet ndeshja e sezonit.
“Të dielën do të tentojmë të fitojmë, pasi nuk kemi rrugë tjetër. Gjykoj se ndaj korçarëve luhet ndeshja e sezonit për ne, pasi jemi sa pranë dhe larg objektivit. Një rezultat pozitiv, që besoj se do ta arrijmë, na motivon më shumë për të mbajtur deri në fund vendin e katërt. Ndërsa një rezultat negativ do të ndikonte për keq.
Investimi që është bërë te Luftëtari dhe mbështetja e madhe financiare e presidentit Grigor Tavo na bën që të japim gjithçka në fushë. E kemi treguar veten se edhe ndaj ekipeve pretendentë për titull mund t’ia dalim, aq më tepër që luajmë para tifozëve tanë”, ka thënë vlonjati i Luftëtarit, i cili është një prej lojtarëve me eksperiencë në Superiore nga grupi aktual. Liçaj ka luajtur edhe me Flamurtarin e Skënderbeun në elitë.
Stërvitja
Gjatë së martës skuadra gjirokastrite nisi përgatitjet me dy seanca. Të gjithë futbollistët ishin në dispozicion të trajnerit Mlladen Milinkoviç. Lajm i mirë është rikthimi i mbrojtësit Edi Bojom dhe mesfushorit Behar Ramadani, dy lojtarë shumë të rëndësishëm për bluzinjtë. E vetmja mungesë për sfidën me korçarët është ajo e mesfushorit Brixhild Brahimaj, që ka plotësuar numrin e kartonëve.
