Vllaznia ka qenë një skuadër shumë aktive në këtë merkato verore, duke “transformuar” thuajse totalisht ekipin në krahasim me atë të sezonit të shkuar. Me kuqeblutë që mes largimesh dhe afrimesh i kanë dhënë një “fytyrë” tjetër skuadrës për edicionin 2025-26.
Por, te shkodranët duket se mendojnë edhe për të ardhmen, duke afruar në skuadër elementë të perspektivës dhe nga të cilët mund të përfitohet si ekonomikisht apo edhe sportivisht. Një ndër ta është Nikolas Kofi, sulmuesi 19-vjeçar nga Bregu i Fildishtë i cili në sezonin e shkuar u aktivizua në vendin tonë me Laçin.
Shtatlarti e ka mbyllur aventurën e tij me bardhezinjtë dhe prej disa javësh po stërvitet në radhët e Vllaznia “B”. Ku me skuadrën e dytë të kuqebluve ka rënë në sy për aftësitë e tij dhe ka bindur momentalisht. Ku edhe në miqësoren e fundit ndaj Basanias që Vllaznia “B” fitoi 3- 1, Kofi do të shënonte një dopietë me dy gola shumë të bukur. Duke treguar shumë për cilësitë e tij dhe aftësinë për të shënuar gola. Mosha e tij e re patjetër është një favor dhe momentalisht do pritet edhe pak nga ana e drejtuesve që t’i ofrojnë një kontratë 19-vjeçarit.
Aktualisht ivoriani vijon stërvitjen me Vllaznia “B” dhe performancat e tij kanë “ngrohur” drejtuesit, por edhe stafin teknik të ekipit të parë. Të cilët pas largimit edhe të Mensah mund të marrin në skuadrën “A” një tjetër sulmues nga Afrika, me Kofin që duket një kandidat potencial për të qenë pjesë e 9 herë kampionëve të vendit tonë në sezonin e ri. Pavarësisht se minutat ish-sulmuesi i Laçit mund t’i ketë të garantuara vetëm te Vllaznia “B”, pasi konkurrenca për një vend në sulmin e ekipit të parë duket shumë e “ashpër” tashmë edhe me afrimin e Çarls Bismark në radhët e shkodranëve.
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
