Bylisi ka qenë shumë aktiv në merkaton e verës, madje duke afruar plot 15 futbollistë, nga Kategoria e Dytë, e Parë, Superiorja por edhe të huaj, të kombësive të ndryshme. Në Ballsh edhe trajneri është i huaj. Veljko Dovedan nga Bosnja zgjidhi një muaj më parë që të vijonte karrierën si trajner në Ballsh.
Por, ballshiotët kanë plotësuar edhe stafin, me Dritan Kristidhin, një emër i njohur në futbollin gjirokastrit dhe atë shqiptar.Kristidhi ka punuar si përgatitës portierësh te Luftëtari në periudha të ndryshme, kur skuadra gjirokastritre ka qenë në Kategorinë e Parë, por edhe në Superiore.
Pak ditë më parë është bërë pjesë e stafit të skuadrës ballshiote, ndërsa eksperiencën e tij te gjirokastritët, por edhe te përfaqësuesja U-17 kuqezi si përgatitës portierësh, pritet që ta vërë në dispozicion edhe të “gardianëve” të skuadrës së Bylisit.
