Avokati Andrea Zotaj, pjesë e Dhomës së Avokatisë në Gjirokastër, është kanosur në orët e mbrëmjes se djeshme, 28 mars. Ngjarja ka ndodhur në rrugën e vjetër te fshatit Qesarat në Memaliaj, teksa avokat Zotaj i shoqëruar nga nipi i tij, ishin duke shkuar në zonë me autoveturën e tyre.
Fatos Lamaj, 41 vjeç, nga fshati Ane Vjosë në Memaliaj, u ka dalë para dhe i ka kanosur pas një sherri për motive të dobëta, sipas njoftimit të policisë. Ai ka qëlluar me armë zjarri në ajër dhe më pas ka fshehur armën në një zonë të pyllëzuar. Lamaj është arrestuar nga Policia, ndërsa arma bashkë me fishekët është sekuestruar nga policia.
Avokati Lamaj pretendon se kanosja ka ndodhur për shkak të detyrës. Autori ishte ndaluar nga policia dy ditë para ngjarjes, sipas avokatit, për shkak të një sherri që ai ka pasur me të afërmin e tij për çështje pronësie. Pasi ka qëndruar 1 natë në paraburgim, sipas avokatit, ai ka dalë dhe e ka kanosur me arme.
NJOFTIMI I POLICISE SE SHTETIT
Mbrëmjen e djeshme, qëlloi me armë zjarri në ajër, për të kanosur 2 shtetas, kapet menjëherë pas ngjarjes dhe vihet në pranga 41-vjeçari.
Gjendet arma e zjarrit (pushkë), të cilën 41-vjeçari e fshehu në një zonë të pyllëzuar, dhe sekuestrohet bashkë me municion luftarak.
Menjëherë pas njoftimit të marrë më datë 28.03.2024, rreth orës 19:30, se në fshatin Qesarat, ishte qëlluar me armë zjarri, në ajër, specialistët e Seksionit për Hetimin e Krimeve të Stacionit të Policisë Memaliaj organizuan punën dhe shkuan në vendngjarje, me qëllim zbardhjen e rrethanave të rastit dhe arrestimin e autorit/ëve.
Si rezultat i veprimeve të shpejta operacionale, shërbimet e Policisë kapën dhe vunë në pranga autorin e dyshuar të këtij rasti, shtetasin F. L., 41 vjeç, banues në Memaliaj.
Nga hetimet e deritanishme dyshohet se ky shtetas, për motive të dobëta, ka qëlluar me armë zjarri (pushkë), në ajër, me qëllim kanosjen e shtetasve A. Z., 54 vjeç dhe E. Z., 34 vjeç, të afërm të njëri-tjetrit, të dy banues më fshatin Anë Vjosë. Më pas, ai ka fshehur armën e zjarrit, në një zonë të pyllëzuar, në fshatin Qesarat.
Arma e zjarrit u gjet nga shërbimet e Policisë dhe u sekuestrua në cilësinë e provës materiale, së bashku me disa fishekë.
Materialet procedurale i kaluan Prokurorisë, për veprime të mëtejshme.
