Pedagogia e Gjuhësisë, Elsa Skënderi prezantoi librin e saj të ri, “Peizazhi linguistik i Tiranës”, në emisionin “Opinion”, ku tregoi edhe disa të dhëna interesante.
Sipas saj, fjala më e shpeshtë në emërtesa në Tiranë është fjala “bar”. Më pas vijnë fjalë të tjera si travel, shop, exchange, farmaci etj.
Po ashtu, një detaj tjetër interesant i theksuar nga Skënderi, është se gjuha shqipe zë 22.7% të emërtesave në rrugën “Myslym Shyri” në Tiranë, ndërsa anglishtja zë dyfishin e shqipes.
“Dy të dhëna që mbase janë interesante. Peizazhi gjuhësor në rrugën “Myslym Shyri”, gjuha shqipe zë 22.7% të emërtesave, ndërsa anglishtja zë 38.5%, domethënë dyfishi. Gjuhë të tjera kemi frëngjishten me 5.7%, spanjishten 1.2% pastaj janë përdorime emërtesa që shfaqen në kombinim. Fjala më e shpeshtë në peizazhin linguistik të Tiranës, gjejeni? Bar.
Fjala tjetër është travel, shop, exchange, farmaci, servise, argjendari dhe vazhdon pastaj studio, bankë etj. Edhe në këtë unë kam nxjerrë diku 42 njësi të fjalëve që shfaqen më shpesh në emërtesa, mbizotërojnë fjalë që janë në anglisht.
Nuk është çudi që fjala “bar” të jetë fjala më e shpeshtë në Tiranë, duke marrë parasysh numrin e lartë të kafeneve në Shqipëri.
