Vajza e Ismail Kadaresë, Besiana, u përzgjodh si zëvendëspresidente e Asamblesë së Përgjithshme të Organizatës së Kombeve të Bashkuara në sesionin e 75 të saj. Kjo është një arritje jo vetëm personale e saj, por edhe për Shqipërinë, që në këtë sesion do të përfaqësohet nga vajza e shkrimtarit që njihet përtej kufijve.
Vetë Besiana shkroi në rrjetet sociale:
“Krenare të njoftoi se Shqipëria është zgjedhur si zëvendës/presidente në sesionin e 75 të Asamblesë së Përgjithshme në Organizatën e Kombeve të Bashkuara. Është një nder i madh për të shërbyer si zëvendës/presidente në këtë sesion historik dhe po shoh para për të punuar me ambasadorin turk Volkan Bozkir, që është edhe presidenti i Asamblesë së Përgjithshme.”
Për këtë lajm reagoi edhe ambasadorja amerikane në Tiranë, Yuri Kim:
“Urime Besiana Kadare si e përzgjedhura e Shqipërisë në këtë post të rëndësishëm”.
Ndërsa Presidenti Ilir Meta shkruan:
“Caktimi i Shqipërisë për të mbajtur postin e Zëvendëspresidentit për Sesionin e 75-të të Asamblesë së Përgjithshme në Organizatën e Kombeve të Bashkuara është një mundësi shumë e mirë për përfaqësimin dinjitoz të vendit tonë në këtë institucion tepër të rëndësishëm botëror. Shumë suksese Ambasadores Besiana Kadare në ushtrimin e kësaj detyre dhe përgjegjësie të lartë”.
Kujtojmë se më herët Besiana Kadare ka shërbyer si sekretare e parë në Misionin e Përhershëm të Shqipërisë në OKB, në vitet 2002-2005. Më pas ajo u kthyer në Shqipëri për të punuar në Agjencinë e Shteteve të Bashkuara për Zhvillimin Ndërkombëtar (USAID). Në 2008-n, Besiana do të shërbente në Ambasadën e Shqipërisë në Francë, ndërsa nga 2011-20016 ajo ishte ambasadore e Shqipërisë dhe delegate e përhershme në organizatën Arsimore, Shkencore dhe Kulturore në Kombet e Bashkuara (UNESCO), në Paris.
