Emisioni “Ju flet Moska” analizoi vonesat e krijuara lidhur me dorëzimin e trupit të 35-vjeçarit grek Kostandinos Kaçifas, i vrarë në Bularat nga forcat RENEA. Kastriot Myftaraj vonesën nuk e lidh me ekspertizën mjeko-ligjore, por me një frikë të qeverisë shqiptare rreth asaj çfarë mund të ndodhë pas dorëzimit të trupit.
Myftaraj gjykon se qeveria shqiptare i druhet politizimit të ceremonisë së varrimit dhe pjesmarrjes së njerëzve nga Greqia.
Myftaraj: Arsyeja që qeveria po e zgjat këtë çështje, nuk ja dorëzon familjes kufomën është sepse i trembet asaj që do të ndodhë kur të dorëzohet kufoma, shndërrimit të varrimit në një manifestim politik me pasoja të rënda destabilizuese.
Këtë gjë duhet ta kishin menduar kur e kryen me aq lehtësi vrasjen, sepse mund ta kishin lënë atë ekstremistin grek, i cili kreu një veprim kriminal, të gjithë biem dakord për këtë, në Shqipëri së paku, ta kishin lënë të ikte dhe atëherë t’ia kërkonin shtetit grek ta ekstradonte.
Mbetej në dorën e Greqisë kjo gjë, Shqipëria në të njëjtën kohë shpëtonte nga këto pasoja që po na ndodhin tani, por edhe kishte një mjet për të ushtruar presion ndaj Greqisë, mjet që mund të kthehej shumë i favorshëm në bisedimet e ardhshme që kemi, të vështira.
Greqia për të mbajtur fytyrën e pastër para ekstremistëve të vet nuk do ta dorëzonte dhe do të ishte gatshme të për të paguar një çmim politik për të mos e dorëzuar, aq më tepër qeveria e majtë greke që është sot në pushtet që gjendet para zgjedhjeve të vështira.
Duke e lënë të ikte do ta kishim në një birucë më të sigurt ekstremistin Kaçifas bashkë me kryeministrin grek, do ti kishin duart e lidhura me të njëjtat pranga atje. Por qeveria zgjodhi rrugën tjetër, rrugën heroike, të forcës.
Kjo rrugë nuk ishte për ti treguar Greqisë sa të fortë jemi ne, por për të fituar dashamirësinë e Turqisë, kundërshtarit të Greqisë, por edhe për tu thënë kryeministri Rama shqiptarëve që shikoni se unë vras dhe grekë, jo vetëm shqiptarë.
Qeveria ndodhet në situatën kur për turp kërkon të bëjë marrëveshje private me familjen, që ua dorëzojmë trupin por të mos politizohet varrimi, të bëhet një varrim shpejt e shpejt.
Duke iu trembur pjesmarrjes në varrim të turmave që mund të vinë nga Greqia. Qeveria nuk di ti ndalojë, por edhe vetë ndalimi i tyre në kufi do të përbënte një ngjarje ndërkomnbëtare, përplasje të ashpra. Deri dhe në thyerje kufiri mund të ndodhte.
